ഒടുവില്‍ സെറീന റാക്കറ്റ് താഴ്ത്തി
സെറീന വില്യംസ് ഇനി ടെന്നീസ് മുന്‍താരം. യുഎസ് ഓപ്പണിനു ശേഷം റാക്കറ്റ് താഴ്ത്തുമെന്നു പ്രഖ്യാപിച്ച സെറീന മൂന്നാം റൗണ്ടില്‍ മതിയാക്കി. ഇന്നു നടന്ന മൂന്നാം റൗണ്ട് പോരാട്ടത്തില്‍ ഓസ്‌ട്രേലിയന്‍ താരം അയ്‌ല ടൊമിയാനോവിക്കിനോട് ഒന്നിനെതിരേ രണ്ടു സെറ്റുകള്‍ക്കു തലകുനിച്ച് ഇതിഹാസ താരം മടങ്ങി. സ്‌കോര്‍ 6-7, 7-5, 1-6.
ഫ്‌ളഷിങ് മെഡോസിലെ ഹാര്‍ഡ്‌കോര്‍ട്ടില്‍ ഓസീസ് യുവതാരത്തിനെതിരേ പൊരുതി തോല്‍ക്കുകയായിരുന്നു സെറീന. യുവതാരത്തെ വെല്ലുന്നു സര്‍വുകളുമായി തുടങ്ങിയ സെറീനയ്ക്കു പക്ഷേ യുവത്വത്തിനു മുന്നില്‍ പിടിച്ചു നില്‍ക്കാനായില്ല.
മൂന്നു മണിക്കൂര്‍ നീണ്ട പോരാട്ടത്തില്‍ ആരാധകരെ മുഴുവന്‍ ആനന്ദിപ്പിച്ചായിരുന്നു സെറീനയുടെ മടക്കം. മൂന്നാം സെറ്റില്‍ അഞ്ചു മാച്ച് പോയിന്റുകള്‍ രക്ഷിച്ചിടുക്കേണ്ട അവസരത്തിലും പഴയകാല പ്രതാപത്തിനോട് നീതി പുലര്‍ത്തുന്ന തരത്തില്‍ പോരാടിയ സെറീന ഒടുവില്‍ തോല്‍വി സമ്മതിക്കുകയായിരുന്നു.
