നിഖാത് സരീന് സ്വര്‍ണം; ലോക വനിതാ ബോക്സിങ് ചാമ്പ്യന്‍ഷിപ്പില്‍ ഇന്ത്യയ്ക്ക് മൂന്നാം സ്വര്‍ണം
ലോക വനിതാ ബോക്സിങ് ചാമ്പ്യന്‍ഷിപ്പില്‍ വീണ്ടും ഇന്ത്യന്‍ സ്വര്‍ണത്തിളക്കം. 50 കിലോഗ്രാം വിഭാഗത്തില്‍ നിഖാത് സരീനാണ് സ്വര്‍ണം നേടിയത്. വിയറ്റ്‌നാമിന്റെ നുയന്‍ തി താമിനെ പരാജയപ്പെടുത്തിയാണ് ഇന്ത്യന്‍ താരത്തിന്റെ കിരീട നേട്ടം. (സ്കോര്‍ 5-0). മേരി കോമിന് ശേഷം ലോക ബോക്സിങ് ചാമ്പ്യന്‍ഷിപ്പില്‍ തുടര്‍ച്ചയായി സ്വര്‍ണം നേടുന്ന രണ്ടാമത്തെ ഇന്ത്യന്‍ വനിതയാണ് നിഖാത് സരിന്‍. കഴിഞ്ഞ വര്‍ഷം നടന്ന കോമണ്‍വെല്‍ത്ത് ചാമ്പ്യന്‍ഷിപ്പിലും നിഖാത് സരീന് ഇന്ത്യയ്ക്കായി സ്വര്‍ണം നേടിയിരുന്നു.
അതേസമയം, ഇന്ത്യ ആതിഥേയത്വം വഹിക്കുന്ന ലോക ചാമ്പ്യന്‍ഷിപ്പില്‍ രാജ്യത്തിന്റെ മൂന്നാം സ്വര്‍ണമാണ് നിഖാത് സരീന് സ്വന്തമാക്കിയത്. 48 കിലോഗ്രാം വിഭാഗത്തില്‍ ഇന്ത്യയുടെ നീതു ഘഗാസും 81 കിലോഗ്രാം വിഭാഗത്തില്‍ സ്വീറ്റി ബൂറയും നേരത്തെ സ്വര്‍ണം നേടിയിരുന്നു.
ഇതിഹാസ താരം മേരികോമിന്റെ നിഴലില്‍ മങ്ങിപ്പോയ താരമായിരുന്നു നിഖാത് സരീന്. എന്നാല്‍ സരീന്റെ അമ്പരിപ്പിക്കുന്ന വളര്‍ച്ചയായിരുന്നു കഴിഞ്ഞ ഒരു വര്‍ഷത്തിനിടെ കായിക ലോകം കണ്ടത്. 26 കാരിയായ സരീന് 2022 ല്‍ ഇസ്താംബൂളില്‍ നടന്ന ലോക ചാമ്പ്യന്‍ഷിപ്പില്‍ കിരീടം നേടിയിരുന്നു. ഇതോടെ ലോക മീറ്റില്‍ സ്വര്‍ണം നേടുന്ന രാജ്യത്തുനിന്നുള്ള അഞ്ചാമത്തെ വനിതയായി നിഖാത് സരിന്‍ മാറി.
