ഏസര്‍ നൈട്രോ 16 ഗെയിമിങ് ലാപ്ടോപ്പ് ഇന്ത്യയിലെത്തി

ഇന്ത്യൻ വിപണിയില്‍ പുതിയ ഗെയിമിങ് ലാപ് ടോപ്പ് പുറത്തിറക്കി ഏസർ. ഏസര്‍ നൈട്രോ 16 എന്ന മോഡലാണ് കമ്പനി അവതരിപ്പിച്ചിരിക്കുന്നത്. ജിഫോഴ്സ് ആർടിഎക്സ് 4060, ജിഫോഴ്സ് ആർടിഎക്സ് 4050 എന്നീ രണ്ട് ജിപിയു വേരിയന്റുകളിൽ എഎംഡി റൈസൺ 7 7840 എച്ച്എസ് ഒക്ടാ കോർ പ്രോസസറുമായിട്ടാണ് ഏസർ നൈട്രോ 16 പുറത്തിറങ്ങിയത്.

ഒബ്സിഡിയൻ ബ്ലാക്ക് കളർ ഓപ്ഷനില്‍ വരുന്ന ലാപ്ടോപ്പിന്റെ ഡിസ്പ്ലേ ഏകദേശം 16 ഇഞ്ചാണ്. 165Hz വരെ റിഫ്രഷ് റേറ്റുള്ള ഈ ഡിസ്പ്ലെയ്ക്ക് 400 നിറ്റ്സ് പീക്ക് ബ്രൈറ്റ്നസുമുണ്ട്. ഓവർ ഡ്രൈവ് വഴി 3 എംഎസ് സ്പീഡുള്ള റസ്പോൺസ് ടൈമുമുണ്ടെന്നതാണ് പ്രത്യേകത. 32 ജിബി വരെ DDR5 റാമും 512 ജിബി PCIe Gen4 NVMe സ്റ്റോറേജുമാണ് ഏസർ നൈട്രോ 16 ലാപ്ടോപ്പിലുള്ളത്. ഒക്ടാ-കോർ എഎംഡി റൈസൺ 7 7840എച്ച്എസ് പ്രോസസറാണ് ലാപ്ടോപ്പിന് കരുത്ത് നൽകുന്നത്. ലാപ്‌ടോപ്പിൽ ഡ്യുവൽ ഫാൻ, ഡ്യുവൽ ഇൻടേക്ക്, ക്വാഡ് എക്‌സ്‌ഹോസ്റ്റ്, ലിക്വിഡ് മെറ്റാ ഗ്രീസ് എന്നിവയുണ്ട്. ലാപ്ടോപ്പ് ചൂടാകുന്നത് തടയാനായി കൂളിങ് സിസ്റ്റമായി ഒരു ഡ്യുവൽ-ഫാൻ സിസ്റ്റവും ഏസർ നൈട്രോ 16യിൽ നൽകിയിട്ടുണ്ട്.

എൻവീഡിയ ജീഫോഴ്സ് ആർടിഎക്സ് 4050 6 ജിബി ഗ്രാഫിക്സ് കാർഡിനൊപ്പം എഎംഡി റൈസൺ 7 7840HS പ്രോസസറുമായി വരുന്ന ഏസർ നൈട്രോ 16 ലാപ്ടോപ്പിന് 1,14,990 രൂപയാണ് ഇന്ത്യയിലെ വില. ഈ മോഡലിന്റെ ജിഫോഴ്‌സ് ആർടിഎക്‌സ് 4050 8ജിബി ഗ്രാഫിക്‌സ് വേരിയന്റിന് 1,43,550 രൂപയാണ് വില. 6 ജിബി ഡെഡിക്കേറ്റഡ് ജിഡിഡിആർ6 വിആർഎം, ജിഫോഴ്‌സ് ആർടിഎക്സ് 4060, 8 ജിബി ഡെഡിക്കേറ്റഡ് ജിഡിഡിആർ6 വിആർഎം എന്നീ രണ്ട് ജിപിയു വേരിയന്റുകളാണുള്ളത്.

സ്റ്റീരിയോ ഔട്ട്‌പുട്ടോടുകൂടിയ ഡ്യുവൽ 2W സ്പീക്കറുകളും, മൾട്ടി-ജെസ്‌റ്റർ ടച്ച്‌പാഡ്, നൈട്രോസെൻസ് കീകളോടുകൂടിയ കസ്റ്റമൈസ് ചെയ്യാവുന്ന 4 സോൺ ആർജിബി ബാക്ക്‌ലൈറ്റ് കീബോർഡുമാണ് ഏസർ നൈട്രോ 16 ലാപ്ടോപ്പിൽ ഉള്ളത്. മൾട്ടി-ജെസ്‌റ്റർ ടച്ച്‌പാഡ്, നൈട്രോസെൻസ് കീകളോടുകൂടിയ യുഎസ്ബി 3.2 ജെൻ 2 പോർട്ട്, യുഎസ്ബി 3.2 ജെൻ 2 പോർട്ട്, ഡിസി ഇൻ ഉള്ള യുഎസ്ബി 3.2 ജെൻ 2 ടൈപ്പ് സി പോർട്ട്, യുഎസ്ബി 2.0 പോർട്ട്, യുഎസ്ബി 4 പോർട്ട് എന്നിവയാണ് കണക്റ്റിവിറ്റി ഓപ്ഷനുകൾ.

10 മണിക്കൂർ വരെ ബാറ്ററി ലൈഫ് നൽകുന്ന 90Wh ബാറ്ററിയാണ് ലാപ്ടോപ്പിൽ ഉള്ളത്. ഈ ബാറ്ററി വേഗത്തിൽ ചാർജ് ചെയ്യാൻ സഹായിക്കുന്നത് 330W എസി അഡാപ്റ്ററാണ്. നിരവധി സവിശേഷതകളുള്ള ലാപ്ടോപ്പ് രാജ്യത്തുടനീളമുള്ള എല്ലാ ഏസർ എക്‌സ്‌ക്ലൂസീവ് സ്റ്റോറുകളിലും, ഏസർ ഇ-സ്റ്റോർ, ആമസോൺ, ഫ്ലിപ്പ്കാർട്ട് എന്നിവ വഴിയും ഉപയോക്താക്കള്‍ക്ക് ലഭ്യമാകും.