എട്ട് ജിബി റാം, 128ജിബി സ്റ്റോറേജ്: പുതിയ വേരിയൻ്റുമായി മോട്ടോ ഇ13

ഉയര്‍ന്ന സ്‌റ്റോറേജ് കപ്പാസിറ്റിയുയുള്ള മൊബൈല്‍ ഫോണുകളുടെ വിപണി പിടിക്കാന്‍ മോട്ടോ 13ന്റെ പുതിയ വേരിയന്റ് എത്തി. ഈ വര്‍ഷം ഫെബ്രുവരിയിലാണ് രണ്ട് സ്റ്റോറേജ് ഓപ്ഷനുകളിലും മൂന്ന് നിറങ്ങളിലുമാണ് ആദ്യ വേരിയന്റുകള്‍ എത്തിയത്. കൂടുതല്‍ റാമും ഇന്‍ബില്‍റ്റ് സ്റ്റോറേജുമായി എത്തുന്ന പുതിയ വേരിയന്റിന് 5,000mAh ബാറ്ററി ലഭിക്കും.

6.5-ഇഞ്ച് എച്ഡി + (1600 x 700 പിക്സലുകൾ) ഐപിഎസ് എൽസിഡി ഡിസ്പ്ലേയാണ് സ്മാർട്ട്ഫോണിൻ്റെ മറ്റൊരു പ്രത്യേകത. 13 മെഗാപിക്‌സൽ പ്രൈമറി റിയർ സെൻസറും എൽഇഡി ഫ്ലാഷ് യൂണിറ്റും 5 മെഗാപിക്‌സൽ ഫ്രണ്ട് ക്യാമറ സെൻസറും ഡിസ്‌പ്ലേയുടെ മുകൾഭാഗത്ത് കൊടുത്തിട്ടുണ്ട്. മോട്ടോ ഇ13യിൽ ഡോൾബി അറ്റ്‌മോസ് ഓഡിയോയും ലഭ്യമാണെന്നതാണ് മറ്റൊരു സവിശേഷത.

2.4GHz, 5GHz ഡ്യുവൽ-ബാൻഡ് വൈ-ഫൈ, ബ്ലൂടൂത്ത് 5.0, യുഎസ്ബി ടൈപ്പ്-സി കണക്റ്റിവിറ്റി എന്നിവയും സ്മാർട്ട് ഫോൺ വാഗ്ദാനം ചെയ്യുന്നുണ്ട്. 179.5 ഗ്രാമാണ് ഫോണിൻ്റെ ഭാരം. കൂടാതെ പൊടിയും വെള്ളവും പ്രതിരോധിക്കാനുള്ള ശേഷിയും ഫോണിനുണ്ട്.

8 ജിബി റാമും 128 ജിബി ഇൻബിൽറ്റ് സ്റ്റോറേജുമായി എത്തുന്ന പുതിയ വേരിയൻ്റിന് 8,999 രൂപയാണ് വില. മുമ്പ് ലോഞ്ച് ചെയ്ത 2ജിബി + 64ജിബി, 4ജിബി + 64ജിബി സ്റ്റോറേജ് വേരിയന്റുകൾക്ക് 6,999 രൂപയും, 7,999 രൂപയുമാണ് വില. ഫ്ലിപ്കാർട്ടിലൂടെ ഓഗസ്റ്റ് 16 മുതൽ പുതിയ വേരിയൻ്റ് വിപണിയിൽ ലഭ്യമാകും. അറോറ ഗ്രീൻ, കോസ്മിക് ബ്ലാക്ക്, ക്രീം വൈറ്റ് കളർ ഓപ്ഷനുകളിലാണ് ഹാൻഡ്‌സെറ്റ് എത്തുക.