കയ്യിലും 'കാശിലും' ഒതുങ്ങും; ബഡ്ജറ്റ് വിഭാഗത്തില്‍ ഫോള്‍ഡബിള്‍ സ്മാർട്ട്ഫോണുമായി സാംസങ്
ഫോള്‍ഡബിള്‍ സ്മാർട്ട്ഫോണിന്റെ കാര്യത്തില്‍ വിപണിയിലെ ഭീമന്മാരാണ് സാംസങ്. കമ്പനിയുടെ ഫോള്‍ഡ്, ഫ്ലിപ്പ് വേരിയന്റുകള്‍ സ്മാർട്ട്ഫോണ്‍ പ്രേമികള്‍ക്കിടയിലും വലിയ സ്വീകാര്യത നേടിയിരുന്നു. പക്ഷേ, ഒരു ലക്ഷം രൂപയിലധികം വില വരുന്നു എന്നത് സാധാരണക്കാർക്ക് എത്തിപ്പിടിക്കാവുന്നതിലും ദൂരത്തിലേക്ക് പ്രസ്തുത വേരിയന്റുകളെ എത്തിച്ചെന്ന് പറയാം. എന്നാല്‍ ഇതിന് പരിഹാരം സാംസങ് കണ്ടെത്തിയിരിക്കുന്നതായാണ് പുറത്ത് വരുന്ന റിപ്പോർട്ടുകള്‍.
ബഡ്ജറ്റ് വിഭാഗത്തില്‍ സാംസങ് ഫോള്‍ഡബിള്‍ ഫോണുകള്‍ വിപണിയിലിറക്കാനൊരുങ്ങുന്നു എന്നാണ് റെവഗ്നസ് സമൂഹ മാധ്യമമായ എക്സിലൂടെ പങ്കുവച്ചിരിക്കുന്ന വിവരം. 33,000 മുതല്‍ 42,000 രൂപ വരെയായിരിക്കും ഫോണുകളുടെ വിലയെന്നും സൂചനയുണ്ട്. എഫ് ഇ വിഭാഗത്തിലായിരിക്കും ഫോണ്‍ വിപണിയിലെത്തുക. സാംസങ് ഗ്യാലക്സി സെഡ് എഫ് ഇ എന്നായിരിക്കും പേര്. ഗ്യാലക്സി സെഡ് ഫോള്‍ഡ് 6, ഫ്ലിപ് 6 എന്നീ മോഡലുകളുടെ ലോഞ്ചിന് ശേഷമായിരിക്കും സെഡ് എഫ് ഇയുടെ വരവ്.
സൂചനകള്‍ ശരിയാണെങ്കില്‍ ഗ്യാലക്ലി എസ് 23 എഫ് ഇയേക്കാള്‍ വിലകുറവായിരിക്കും സെഡ് എഫ് ഇയ്ക്ക്. എസ് 23 എഫ് ഇയ്ക്ക് ഇന്ത്യയില്‍ 59,999 രൂപയാണ് വില. ഫോണിന്റെ ഫീച്ചറുകള്‍ സംബന്ധിച്ചുള്ള വിവരങ്ങള്‍ ലഭ്യമായിട്ടില്ല. നിലവില്‍ 50,000 രൂപ റെയ്ഞ്ചില്‍ മോട്ടൊറോള ഉള്‍പ്പടെയുള്ള ബ്രാന്‍ഡുകള്‍ ഫോള്‍ഡബിള്‍ ഫോണുകള്‍ വിപണിയിലിറക്കുന്നുണ്ട്. സാംസങ്ങിന്റെ പുതിയ നീക്കത്തെ മറ്റ് ബ്രാന്‍ഡുകള്‍ പിന്തുടരാനുള്ള സാധ്യതകളും നിലവിലുണ്ട്.
