ആവശ്യത്തിലധികം ഓക്സിജന് ശരീരത്തിലെത്തിയാല്‍ എന്തു സംഭവിക്കും? പഠനവുമായി ഗവേഷകര്‍
ആവശ്യത്തിന് ഓക്സിജന് ലഭിക്കാഞ്ഞാല്‍ അത് ശരീരത്തെ എങ്ങനെ ബാധിക്കുമെന്ന് അറിയാന്‍ ശ്വാസം അടക്കിപ്പിടിച്ച് കുറച്ച് നിമിഷങ്ങള്‍ മതിയാകും. എന്നാല്‍ ആവശ്യത്തിലധികം ഓക്സിജന് അടങ്ങിയ വായു ശ്വസിച്ചാലോ? ഇതിന്‌റെ പാര്‍ശ്വഫലങ്ങള്‍ മനസിലാക്കാന്‍ ഗ്ലാഡ്സ്റ്റണ്‍ ഇന്‍സ്റ്റിറ്റ്യൂട്ടിലെ ഗവേഷകര്‍ നടത്തിയ പഠനത്തില്‍ കണ്ടെത്തിയത് അസാധാരണമായ ചില പ്രോട്ടീനുകളെയാണ്.
ഓക്സിജന്റെ വ്യത്യസ്ത തലങ്ങളുള്ള വായു ശ്വസിക്കുന്നത് ശ്വാസകോശങ്ങളിലും ഹൃദയത്തിലും മസ്തിഷ്‌കത്തിലും വ്യത്യസ്ത പ്രോട്ടീനുകളുടെ രൂപീകരണത്തെയും അപചയത്തെയും എങ്ങനെ ബാധിക്കുന്നുവെന്ന് സയന്‍സ് അഡ്വാന്‍സസ് ജേണലില്‍ റിപ്പോര്‍ട്ട് ചെയ്ത ഈ പഠനം വിശദീകരിക്കുന്നു. ഹൈപ്പര്‍ഓക്സിയയോട് കോശങ്ങള്‍ എങ്ങനെ പ്രതികരിക്കുന്നു എന്നതിനെ നിയന്ത്രിക്കുന്നതില്‍ പ്രധാന പങ്ക് വഹിക്കുന്ന ഒരു പ്രത്യേക പ്രോട്ടീനും ഈ പഠനം എടുത്തുകാണിക്കുന്നു. ഈ ഫലങ്ങള്‍ പല രോഗങ്ങളുടെയും സൂചനകളും നല്‍കുന്നതായി പഠനത്തിനു നേതൃത്വം നല്‍കിയ ഗ്ലാഡ്സ്റ്റണ്‍ ഇന്‍സ്റ്റിറ്റ്യൂട്ട് അസിസ്റ്റന്റ് ഇന്‍വെസ്റ്റിഗേറ്റര്‍ ഇഷാ ജെയിന്‍ പറയുന്നു. ആരോഗ്യ കാരണങ്ങളാല്‍ യുഎസില്‍ ഒരു ദശലക്ഷത്തിലധികം ആളുകള്‍ പ്രതിദിനം കൃത്രിമ ഓക്സിജന് ശ്വസിക്കുന്നുണ്ട്. ചില സന്ദര്‍ഭങ്ങളില്‍ ഇത് കാര്യങ്ങള്‍ കൂടുതല്‍ വഷളാക്കുമെന്ന് പഠനം സൂചന നല്‍കുന്നു.
വളരെ കുറച്ച് ഓക്സിജന്റെ തന്മാത്രാ ഫലങ്ങള്‍ ഉപയോഗിച്ച് ഓക്സിജന്റെ ഇഫക്റ്റുകള്‍ മനസ്സിലാക്കുന്ന ഗവേഷണങ്ങള്‍ ഇതിനു മുന്‍പ് ഉണ്ടായിട്ടുണ്ട്. ഇവയെല്ലാം ഓക്സിജന്റെ കുറവ് ഏത് ജീനുകളെയാണ് ബാധിക്കുന്നത് എന്നതിലാണ് കൂടുതല്‍ ശ്രദ്ധ കേന്ദ്രീകരിച്ചത്.
കൂടുതല്‍ ഓക്സിജന് ശരീരത്തില്‍ എത്തുമ്പോഴുണ്ടാകുന്ന പ്രവര്‍ത്തനങ്ങള്‍ മനസിലാക്കാന്‍ എലികളിലാണ് ഗവേഷകര്‍ പഠനം നടത്തിയത്. ഇതിനായി 8 ശതമാനം, 21 ശതമാനം, 60 ശതമാനം എന്നീ അളവുകളില്‍ ഓക്സിജന് എലികള്‍ക്കു ശ്വസിക്കാന്‍ നല്‍കി. പുതിയ പ്രോട്ടീനുകളില്‍ സംയോജിപ്പിച്ച നൈട്രജന്റെ ഒരു പ്രത്യേക ഭക്ഷണവും എലികള്‍ക്ക് നല്‍കി. ഈ നൈട്രജന്‍ ഐസോടോപ്പ് ഒരു 'ലേബല്‍' ആയി പ്രവര്‍ത്തിച്ചു. ഇത് ശ്വാസകോശങ്ങളിലും ഹൃദയത്തിലും തലച്ചോറിലുമുള്ള ആയിരക്കണക്കിന് വ്യത്യസ്ത പ്രോട്ടീനുകളിലെ നിരക്ക് കണക്കാക്കാന്‍ ഗവേഷകരെ സഹായിച്ചു.
ഓക്സിജന്റെ അളവ് ഹൃദയത്തെയോ തലച്ചോറിനെയോ അപേക്ഷിച്ച് എലികളുടെ ശ്വാസകോശത്തിലെ പ്രോട്ടീനുകളെ ബാധിച്ചതായി ഗവേഷകര്‍ കണ്ടെത്തി. ഉയര്‍ന്നതോ കുറഞ്ഞതോ ആയ ഓക്സിജന് സാഹചര്യങ്ങളില്‍ അസാധാരണമായ ചില പ്രോട്ടീനുകളെ ഗവേഷകര്‍ തിരിച്ചറിഞ്ഞു. ഉയര്‍ന്ന ഓക്സിജന് അവസ്ഥയില്‍ ജീന്‍ എക്‌സ്പ്രഷനെ നേരിട്ട് ബാധിക്കുന്ന ഒരു പ്രത്യേക പ്രോട്ടീന്‍, MYBBP1A ഗവേഷകര്‍ കണ്ടെത്തി.
ഉയര്‍ന്ന ഓക്സിജന്റെ അളവിനോടുള്ള പ്രതികരണമായി, ശ്വാസകോശത്തില്‍ ഈ പ്രോട്ടീന്‍ അടിഞ്ഞുകൂടുന്നത് റൈബോസോമുകളുടെ ഒരു പ്രധാന ഘടകമായ റൈബോസോമല്‍ ആര്‍എന്‍എയുടെ ഉല്‍പാദനത്തെ ബാധിച്ചേക്കാമെന്ന സൂചനകള്‍ ഗവേഷണ ഫലങ്ങള്‍ നല്‍കുന്നു. ഹൈപ്പറോക്‌സിയയുടെ മോശം ഫലങ്ങളെ പ്രതിരോധിക്കുന്ന തരത്തില്‍ MYBBP1A പ്രോട്ടീനോ അനുബന്ധ തന്മാത്രകളോ ലക്ഷ്യം വച്ചുള്ള ചികിത്സകള്‍ക്ക് ഈ പഠനം സഹായകമാകുമെന്ന് ഗവേഷകര്‍ കരുതുന്നു.
